UONGOZI wa klabu ya Yanga chini ya Rais wake, Hersi Said, umeonekana kumuweka katika wakati mgumu Kocha Mkuu, Pedro Goncalves, baada ya kumsisitiza kuwapa nafasi baadhi ya wachezaji ambao kwa sasa hawapati muda wa kucheza.
Hatua hiyo inatajwa kama aina ya “mtego” kwa kocha huyo, kwani inalazimika kubadili maamuzi yake ya kiufundi ili kuwajumuisha nyota ambao awali hawakuwa sehemu ya chaguo lake la kwanza.
Mashabiki wa Yanga nao wamekuwa wakijiuliza kuhusu hatma ya baadhi ya wachezaji waliosajiliwa lakini hawapati nafasi ya kucheza, akiwemo Farid Mussa na Salum Aboubakar, jambo lililozua mjadala mkubwa ndani na nje ya klabu hiyo.
Akizungumzia suala hilo, msemaji wa Yanga, Ali Kamwe, amesema kuwa katika kikao maalum kilichofanyika, kocha huyo aliwasilisha ripoti yake ya kiufundi na kuulizwa kuhusu sababu za kuwanyima nafasi baadhi ya wachezaji, huku viongozi wakiridhika na maelezo yake.
Hata hivyo, viongozi hao wamesisitiza kuwa umuhimu wa kila mchezaji kupata nafasi ya kuchangia uwanjani, wakiamini kuwa hata wale wenye mchango mdogo wanaweza kuongeza thamani yao iwapo watapewa muda wa kucheza.
Kamwe amesema msukumo huo unatokana na wingi wa michuano inayokabili klabu hiyo kwa sasa, ikiwemo Ligi Kuu, Kombe la Shirikisho na michuano mingine, hali inayofanya kuwa muhimu kwa kikosi chote kushiriki kikamilifu.
Ameongeza kuwa mashabiki wanapaswa kuwa na subira, akisisitiza kuwa wachezaji waliokuwa wakikosa nafasi wataanza kuonekana zaidi uwanjani mara baada ya timu kurejea kwenye ratiba ya ligi.