Klabu ya Simba SC imefanikiwa kunasa saini ya beki wa kulia wa Azam FC, Nathaniel Chilambo, kwa ajili ya kuitumikia klabu hiyo kuanzia msimu ujao wa 2026/27. Chilambo, ambaye mkataba wake na matajiri wa Jiji la Dar es Salaam unatarajiwa tamati mwishoni mwa msimu huu, tayari amesaini mkataba wa awali (Pre-Contract) na “Wekundu wa Msimbazi.” Usajili huu unatajwa kuwa ni mkakati wa uongozi wa Simba wa kuimarisha safu ya ulinzi kwa kuleta damu changa yenye uwezo mkubwa wa kupandisha mashambulizi na kuzuia, huku Chilambo akionekana kuwa chaguo sahihi kufuatia kiwango chake bora alichokionyesha ndani ya Azam FC.
Hatua ya Chilambo kujiunga na Simba akitokea Azam FC inawakumbusha wadau wa soka safari ya beki mkongwe na gwiji wa nafasi hiyo, Shomari Kapombe, ambaye naye alitua Msimbazi akitokea viunga vya Azam Complex. Kama ilivyokuwa kwa Kapombe aliyekuwa mhimili wa Simba kwa miaka mingi na kupata mafanikio makubwa, Chilambo anatarajiwa kuvaa viatu hivyo na kuleta changamoto mpya upande wa kulia wa ulinzi. Usajili huu ni ishara tosha kuwa Simba imedhamiria kufanya maboresho makubwa ya kikosi chake kuelekea msimu mpya, ikilenga kurejesha hadhi yake ya ubingwa katika michuano ya ndani na kimataifa kupitia wachezaji wenye uzoefu na ubora wa hali ya juu.