TETESI: FADLU DAVIDS NA YANGA WASHINDWANA
Mazungumzo kati ya klabu ya Young Africans (Yanga) na kocha raia wa Afrika Kusini, Fadlu Davids, yamegonga mwamba rasmi baada ya pande zote mbili kushindwa kufikia muafaka wa masuala ya kimkataba. Hatua hiyo inahitimisha tetesi zilizokuwa zikimhusisha mwalimu huyo wa zamani wa Raja Casablanca na miamba hiyo ya Jangwani, huku kila upande ukiondoka kwenye meza ya mazungumzo bila saini.
Kufuatia kukwama kwa dili hilo, uongozi wa Yanga umeripotiwa kugeukia mpango mbadala ambapo tayari umeshapata chaguo lingine la Kocha Mkuu atakayekuja kuiongoza timu hiyo kuelekea msimu mpya wa mashindano. Mabingwa hao watetezi wa soka nchini wameonyesha utulivu mkubwa na kuendelea na mikakati yao ya kusuka benchi la ufundi bila kupoteza muda.
Macho na masikio ya mashabiki wa klabu hiyo sasa yanaelekezwa makao makuu ya klabu, Twiga na Jangwani, kusubiri utambulisho rasmi wa chombo kipya kitakachopewa rungu la kukinoa kikosi hicho. Yanga inakabiliwa na kibarua kizito cha kutetea mataji ya ndani pamoja na kuiwakilisha nchi katika michuano mikubwa ya kimataifa barani Afrika.
