Klabu ya Yanga imeweka wazi kuwa iko mbioni kukamilisha usajili mkubwa ambao unatarajiwa kuleta gumzo ndani na nje ya nchi. Taarifa za ndani zinaonyesha kuwa Yanga imeingilia kati harakati za Simba za kumwania straika nyota wa Singida Black Stars, Elvis Rupia, ambaye kwa sasa anaongoza kwa mabao kwenye Ligi Kuu Tanzania Bara.
Awali, Simba ilihusishwa na mpango wa kumsajili mshambuliaji huyo raia wa Kenya, na mazungumzo yalikuwa tayari yameanza. Hata hivyo, Yanga imejitokeza kuwania saini ya Rupia, na sasa inaelekea kumtangaza rasmi mshambuliaji huyo wakati wowote.
Ofisa Habari wa Yanga, Ali Kamwe, alieleza kuwa klabu hiyo inafanya usajili wa kuliboresha kikosi chake wakati wa dirisha dogo la usajili. “Tumeshafanya usajili wa kwanza kwa kumsajili Israel Mwenda kwa mkopo kutoka Singida Black Stars. Sasa, katika siku mbili zijazo, tunatarajia kukamilisha moja ya sajili kubwa sana,” alisema Kamwe.
Kamwe aliongeza kuwa mchakato wa usajili huo ulikuwa mgumu, lakini uongozi wa Yanga umefanikiwa kuvuka changamoto hizo. “Kila kitu kimekwenda vizuri, na wakati wa kumtangaza mchezaji huyu, watu wengi watashangazwa. Huu ni usajili wa aina yake,” alisisitiza.
Mbali na Rupia, Kamwe alieleza kuwa klabu inaendelea na mazungumzo na wachezaji wengine, ingawa anakiri kwamba dirisha hili la usajili limekuwa gumu kwa sababu nyingi za wachezaji bora wapo kwenye timu zao na ni vigumu kwa klabu zao kuwaruhusu.
TP MAZEMBE WAINGIA DAR KUJIANDAA NA YANGA
Wakati huo huo, kikosi cha TP Mazembe kutoka Jamhuri ya Kidemokrasi ya Congo kinatarajiwa kuwasili Dar es Salaam leo saa 11:00 jioni kwa ajili ya mchezo wa hatua ya makundi ya Ligi ya Mabingwa Afrika. Mechi hiyo itapigwa Jumamosi saa 10:00 jioni kwenye Uwanja wa Benjamin Mkapa.
Kocha wa Yanga, Sead Ramovic, anaendelea kuandaa kikosi chake kwa maandalizi makali kuelekea mchezo huo muhimu. Katika mchezo wa awali uliofanyika Lubumbashi, timu hizo zilitoka sare ya bao 1-1.
Kwa sasa, Yanga ipo katika nafasi ya mwisho kwenye Kundi A ikiwa na pointi moja baada ya michezo mitatu. Timu hiyo inahitaji ushindi wa lazima ili kuendelea kuwa na matumaini ya kufuzu hatua ya robo fainali ya michuano hiyo.
