Mchezaji wa zamani wa Newcastle United, Alan Shearer, amedai kuwa Chelsea tayari wamemwambia mshambuliaji wao Raheem Sterling, kutafuta klabu nyingine.
Shearer alifichua hayo baada ya mchezaji huyo wa kimataifa wa Uingereza kuachwa nje kwenye mchezo wa Ligi Kuu dhidi ya Manchester City Jumapili ya jana.
Mengi yaliongelewa baada ya mchezaji huyo kutoonekana kwenye kikosi siku ya jana huku wawakilishi wa mchezaji huyo wakionekana kushangazwa.
Hata hivyo, akizungumza kwenye podcast ya ‘The Rest is Football’, mkongwe Shearer alisema amepenyezewa taarifa kuwa upande wa kocha wa Chelsea, Enzo Maresca tayari walishamwambia Sterling tangu Ijumaa iliyopita kwamba aanze kutafuta klabu nyingine kwa kuwa nafasi yake imeshapata mtu mwingine.