Ancelotti Kuondoka Real Madrid mwisho wa Msimu 2024/2025
Meneja wa Real Madrid, Carlo Ancelotti, ametangaza kuondoka kwenye nafasi yake kama kocha wa klabu hiyo mwishoni mwa msimu wa 2024/2025, akihitimisha awamu ya pili yenye mafanikio makubwa tangu kurejea kwake Julai 2021. Katika kipindi hicho, Muitaliano huyo mwenye umri wa miaka 65 ameiongoza klabu hiyo kufikia mafanikio makubwa ndani na nje ya uwanja.
Ancelotti aliwahi pia kuhudumu kama kocha wa Real Madrid kati ya 2013 na 2015, ambako aliongoza timu kushinda taji lao la 10 la Ligi ya Mabingwa Ulaya (La Decima) mwaka 2014. Katika awamu ya sasa, ametwaa mataji mawili ya Ligi ya Mabingwa Ulaya (2022 na 2024), pamoja na mataji mawili ya La Liga, Copa del Rey, na taji la Klabu Bingwa ya Dunia. Mafanikio haya yamemfanya kuwa mmoja wa makocha wenye historia tajiri zaidi katika klabu hiyo.
Changamoto za Msimu wa Mwisho
Licha ya mafanikio ya misimu iliyopita, msimu wa 2024/2025 umeonyesha changamoto kadhaa kwa Real Madrid. Timu ilipoteza fainali ya Kombe la Supercopa ya Uhispania kwa mahasimu wao, FC Barcelona, kwa kipigo cha 5-2. Pia, matokeo ya kushangaza katika mashindano mbalimbali, ikiwemo baadhi ya vipigo kwenye Ligi ya Mabingwa na La Liga, yameibua maswali kuhusu uimara wa kikosi.
Pamoja na changamoto hizo, Real Madrid bado ipo kileleni mwa La Liga kwa tofauti ya pointi mbili, huku ikishiriki kwenye mashindano ya Ligi ya Mabingwa na Copa del Rey. Ancelotti mwenyewe amekiri kwamba kukosolewa na mashabiki ni sehemu ya changamoto za kuiongoza timu kubwa kama Real Madrid. Akizungumzia hali hiyo, alisema: “Kuna aina tofauti za ukosoaji. Mashabiki wanapopiga filimbi, ni kama wito wa kuamka kwa timu. Ilikuwa changamoto nzuri dhidi ya Celta Vigo, na tumeonyesha sura bora ya timu yetu.”
Sababu za Kuondoka na Matarajio ya Baadaye
Kwa mujibu wa ripoti za redio ya Uhispania, Onda Cero, Ancelotti amefikia uamuzi wa kuhitimisha muda wake katika benchi la Real Madrid mwishoni mwa msimu huu, licha ya kuwa na mkataba unaoendelea hadi mwaka 2026. Uamuzi huu umekuja hata kama timu itashinda mataji zaidi msimu huu, jambo linalodhihirisha kuwa kocha huyo ameona wakati umefika wa kufunga ukurasa wake Bernabeu.
Xabi Alonso Katika Hatua ya Kuchukua Mikoba
Baada ya kutangazwa kuwa Ancelotti ataondoka, jina la Xabi Alonso limeanza kutajwa kama chaguo bora zaidi la kumrithi. Alonso, ambaye ni kocha wa Bayer Leverkusen, amejijengea sifa kama mmoja wa makocha chipukizi bora barani Ulaya.
Mafanikio yake makubwa ni kuiongoza Leverkusen kutwaa taji lao la kwanza kabisa la Bundesliga msimu wa 2023/2024. Kwa kuwa na historia kama mchezaji wa zamani wa Real Madrid, nafasi ya Alonso kuchukua nafasi ya Ancelotti inaonekana kuwa ya kipekee na yenye matumaini makubwa kwa mashabiki wa klabu hiyo.
